പുഴയൊഴുകേണ്ട വഴികൾ

ആരോ തടഞ്ഞൊരൊഴു-

ക്കിനാഴത്തിൻ ഉറവ വറ്റിയ 

വ്യഥിതയാണിന്നു ഞാൻ,

നിലാപ്പൂക്കൾ നനയുന്ന 

കല്ലോല കാന്തിയാൽ പുടവ 

നെയ്യുന്ന ഭൂതകാലക്കുളിർ,

കൊഞ്ചും വിരൽതൊട്ട കളി-

യോടക്കുറുമ്പുകളൊപ്പം,തുഴയ-

റിയാതെ മറുകര തിരയുന്നു,

വിശപ്പിൻ ധ്യാനത്തിൽ സന്യാ-

സിക്കൊറ്റികൾ, ചെറുപരൽ

മീൻഭംഗികൾ ദേശാടനത്തിലും,

കരയരികു ചേരുമിളം നാ-

മ്പിനെത്തൊട്ടു കുസൃതി കാട്ടാൻ 

കൊതിക്കും നീർക്കുമിളകൾ,

നിഴലു മാത്രമായ് വളരും 

ജലരേഖകൾ, ഉറവതേടി വര-

ളുന്ന ഒഴുക്കിന്നാഴങ്ങളും,

ഏറെ വൈകിപ്പോയിപ്പോഴേ,

എങ്കിലുമിനിയും മലിനമാക്കാ-

തിരിക്കുകെൻ നീർവഴികളെ,

വരളും ദാഹത്തിൻ സങ്കടമു-

ള്ളുനിൻ മണ്ണടരുകൾക്കുള്ളിലെ 

ശാപമായ് തീരാതിരിക്കുവാൻ,

കാത്തുവയ്ക്കട്ടെയിറ്റു ദാഹ-

ത്തിൻ കാരുണ്യം ഭാവിജന്മങ്ങൾ 

കെട്ടുപോകാതിരിക്കുവാൻ,

തെന്നലലയും പച്ചച്ച വീഥിയിൽ 

നിറവൃഷ്ടി നെഞ്ചേറ്റി ഞാനിനി-

യൊരാറായി വീണ്ടുമൊഴുകട്ടെ,